Guðni Elísson er prófessor í almennri bókmenntafræði við Háskóla Íslands. Hann lauk cand.mag. prófi í íslenskum bókmenntum árið 1987 og doktorsprófi í enskum bókmenntum frá Bandaríkjunum 1993. Guðni hefur á rúmum þremur áratugum kennt fjölda námskeiða um bókmenntir og kvikmyndir á háskólastigi, jafnt inngangsnámskeið um bókmenntalestur sem og námskeið um afmarkaðra efni, t.d. um rómantísku stefnuna í Englandi og enska endurreisnarleikritun, um ensku skáldin John Milton og Byron lávarð, um hrollvekjur og rökkurmyndir, vistrýni og endalokakúltúr. Eftir Guðna liggur fjöldi fræðilegra greina um bókmenntir og kvikmyndir, auk greina um íslenskt menningarlíf og umhverfismál. Hann er stofnandi alþjóðlega loftslagsverkefnisins Earth101.